quiero tomar una cerveza na barra’l bar y aldericar sobre zizek

taba queriendo escribir coses profundes pero nun toi pa ello dende va años. nestos tres años d’emigración lo que más echo en falta ye poder tomar una cerveza na barra’l chigre. toi fartu de que toles barres, cuando les hai, tean enllenes de coses nun dexando sitiu pa poder beber el cervezu de pie o sentáu nel taburete.

soi de barra dende qu’entame a salir, lo de sentase yera pa durmir o porque yá nun había sitiu na barra. la barra’l chigre ye un espaciu abiertu nel que se comparte dende’l periódicu a comentarios. un espaciu nel que se fala con xente a la que nun visti o esos que son conocíos porque tolos díes tán ehí y anque nun sabéis nin el nome charráis y aldericáis con ellos.

zizek, nes sos munches categorizaciones d’europa, escaez la de la barra’l chigre. intenta esplicar europea pel tamañu’l water o la forma de comer pero escaez qu’hai una europa que va al chigre a socializar y otra europa que va al chigre solu a beber. la primera, la de mio, emborráchase tamién pero socializa. por contra hai otra europa que nel chigre sigue en compartimientos estancos nos que la socialización ye más complicada.

les mios barres: sevilla, paragües, trisquel, posafueyes, esperteyu, román, puente romano, dakar, tropical, bodeguita.